تجربتي مع البيبي فوت الياباني Baby Foot ❤

السلام عليكم

تنبيه:  البوست طويل و فيه قرقرة كتير 

 اليوم بتكلم عن منتج انتشر كثير السنة اللي فاتت و صارت له بدائل كمان بس باقي في كثير مترددين و خايفين من تجربته : مقشر الرجلين من بيبي فوت حتا لو ما جربتيه اكيد سمعتي عنه و شفتي صوره.

 
اولا المنتج الأصلي  ياباني و يوفروه متاجر كثير عالانستغرام  او ممكن تطلبيه من الأمازون و كمان متوفر في السعودية في صيدلية وايتس ( سعره 150 ريال)

اعطيكم فكرة على حالة اقدامي عشان تقدري تقيمي نتيجته و هل حيناسبك . ما اعاني من اي مشكلة في اقدامي الحمد لله ناعمة و مافيها اسمرار و لا خشونة، هذا طبعا بفضل الله و عنايتي فيها : لازم اسبوعيا احطها في مغطس سبا صغير و ادلع نفسي بتنظيف عميق و سنفرة و ماسك و ترطيب و كل كم شهر اعمل بوديكير في الصالون. عنايتي بأقدامي روتين مرررة مهم في اسبوعي لأني البس الكعب بشكل شبه يومي و تتعب مرررة.

(لو حابين ممكن اصورلكم عنايتي الأسبوعية بأقدامي و المنتجات اللي استخدمها)

  انا انسانة ما احب اغامر في بشرتي و جسمي ابدا و اخاف و اتردد من تجربة شي جديد و آخذ وقتي عشان اقرر آخذه او لا. أول ما شفت المنتج دا شدني صراحة و قرأت عنه كثييير من تجارب الأجنبيات و الأغلبية شافوا معاه نتائج مبهرة و اتخلصوا من مشاكل التشقق و الجفاف. وقتها قررت اني مابجربه لأني ما احتاجه.
لين قريت تجربة بلوقر اجنبية قالت انها جربته بس حب للمغامرة و أنها تلبس كعب عالي طول الوقت فحبت تستعمله و تزيل الطبقة الميتة و التعبانة من الجلد و انصدمت من النعومة اللي صارت في اقدامها و انها صارت من جد كأنها بشرة بيبي .
انا هنا غرت منها (هههه) و قلت خلاص لازم اجربه ايش حخسر و رحت اشتريته (في كوريا متوفر في كل الصيدليات و رخيص كمان).

                                 ايش هو البيبي فوت؟  

هو عبارة عن شراب بلاستيك و فيه جل أو سائل مقشر و أحماض فواكه و 17 عنصر طبيعي يساعد على ترطيب القدمين. يستعمل مرة واحدة و نتيجته تبان بعد كم يوم .

مين يقدر يستخدم البيبي فوت ؟

 أي وحده ترغب في تقشير اقدامها و التخلص من الجلد الميت. ممنوع استعماله للحوامل و مرضى السكر او في حال عندك مشكلة جلدية تسبب حساسية أو التهابات و جروح.        
كمان لازم أنبه على شغلة صدمتني لما قرأتها. البيبي فوت يستخدم فقط على القدمين ، لا تفكري تحطيه على ركبك أو اكواعك أو اي منطقة ثانية من جسمك و الشركة منبهة على النقطة دي  

كيف تستخدم البيبي فوت؟

أول شي لازم نغسل الرجل مررررة كويس و ننقعها في موية دافية و بعدها نقص الشرابات من فوق و نلبسها. في لزقات داخل العلبة نستخدمها لتثبيت الشرابات و نعمل مساج خفيف عشان يتوزع السائل على كامل القدمين.
أنا لبست فوقها شراب عشان اقدر اتحرك و خليتها لمدة ساعة و ممكن تعتبريها ساعة استرخاء (اشربي شي تحبيه و ريحي اعصابك)                                                  
بعد الساعة، نشيل البيبي فوت  و نغسل الرجلين بدون صابون و ننشفها كويس.            
وقت التقشير يبدأ بعد يومين ثلاثة و الشكل ممكن يصير يفجع (ههههه) عشان كدا خليكي لابسة الشراب طول الوقت و لا تتعرضي للشمس ابدا ابدا و اهم شي لا ترطبي رجلك في فترة التقشير و حاولي لا تمسكي رجلك و تسحبي القشور بنفسك , مررة غلط كدا ممكن تجرحي رجلك و ما تستفيدي . خلي القشور تطيح من نفسها.

صورتلكم اقدامي في مرحلة التقشير و ترددت كثير اني انزلها عشان المنظر مقزز صراحة . لو كنتي ما تحبي تشوفي الحاجات دي بليز لا تطالعي هههه

.

.

.

.

.

.

 
طبعا شكلها كدا و مثل ما شايفين الحمدلله ما اعاني من تشققات أو جفاف قوي و مع ذلك حبيت النتيجة.
اقدامي تقشرت لمدة اسبوعين و نص و بعدها بدأت مرحلة الترطيب المكثف عشان أحافظ على النتيجة الحلوة اللي شفتها.

ايش هي سلبياته ؟

 ما شفت له اي سلبية غير أنه فترة التقشير ما ينفع تلبسي احذية مفتوحة عشان المنظر موش ولا بد ، و لا يسبب اية الم . صراحة كنت مفكرة انه البوديكير و عنايتي الأسبوعية تكفي لكن ابهرني البيبي فوت نتيجته جميييبيييلة.   

                                   

كم مرة ممكن تكرري عملية التقشير؟

 بالرغم من النتيجة المبهرة للبيبي فوت لازم تلتزمي بالترطيب بعدها و ما ينفع  تستخدمي البيبي فوت اكثر من مرتين في السنة

 
اتمنى حبيتو الريفيو و استفدتو منه

♥♥ يسعدني تفاعلكم 

 عبر  الإنستغرام   miramode90

 الايميل  miramode90@gmail.com