السلام عليكم ♥
اللي متابعيني في الاستقرام يعرفو اني من يومين طلبت مقشر القهوة الي انشهر في الفترة الأخيرة فرانك سكراب . صراحة أول مرة أطلب شي مو مرة مرة مقتنعة فيه لاني ما استسغت المبالغة في المدح للمنتج لكن بخلي الحكم لين أجربه بنفسي. لما يوصلني إن شاء الله و أرجعلكم بتجربتي معاه و كمان بديل له ممكن تسويه بنفسك في البيت.
البوست اليوم بشرحلكم طريقة الطلب من الموقع لأنه في بنات يهمهم هادا الشي و كانو حابين يعرفوا الطريقة و أنا تحمست للموضوع عشان مرة أنقهر من أستغلال بعض التاجرات لحاجة البنات للمنتجات اللي مو متوفرة في السوق و عدم قدرتهم على الطلب من النت . طبعا أستثني من كلامي التاجرات اللي ما يبيعوا بضائعهم بأضعاف أضعاف سعره الأصلي. أتمنى الموضوع يكون مفيد للجميع .
ببدأ بالأساسيات :
ايش تحتاجي عشان تطلبي من النت ؟ (Online Shopping)
1. بطاقة أئتمانية (كريديت كارد) و الأفضل تطلعي وحدة مسبقة الدفع انتي تشحنيها بالمبلغ المطلوب عشان تتسوقي بأمان و كمان ما تتجاوزي ميزانيتك ( الشوبينغ من النت ممكن يتحول لادمان ). كل البنوك عندها هالخدمة ، روحي أكثر من بنك و استفسري عن البطاقة و رسومها عشان تقرري ايش اللي يناسبك.
2. عنوان بريد في السعودية ( في مواضيع كثيرة تشرح طريقة تسجيل عنوانك في البريد السعودي )
لا تستصعبي هالخطوتين عشان تحتاجي تسويهم مرة بس و بعدها تطلبي اي شي من المواقع الموثوقة و اللي توصل للسعودية دايركت .
نرجع لموقع Frank Body
أول شي حابة أتكلم عنه هو الشحن عشان تكون عندك فكرة ؛ موقع فرانك يشحن لكل دول العالم دايركت فما تحتاجي بريد أمريكي للطلب , بريدك السعودي يكفي.
الموقع يعطيكي خيارين للشحن : شحن فيه خاصية التتبع tracked ( يجي معه تراكيتغ نمبر تتابعي فيه شحنتك فين وصلت) و شحن بدون تتبع untracked . أنا اخترت اللي بدون تتبع عشان أرخص و طلبيتي مو كبيرة ، ان شاء الله ما أندم ههههه .
سعر الشحن للمقشر الواحد 6 دولار و نص (بدون تتبع) و الطلب يوصلك في فترة مابين خمس و واحد و عشرين يوم ، و 14 دولار للشحن السريع اللي فيه خاصية التتبع يوصلك الطلب في ثلاث الى خمس أيام و كل ما كان الطلب أكبر كل ما نزلت قسمة الشحن لدرجة عشر طلبات يشحنوها بالشحن السريع اللي فيه رقم تتبع ب 39 دولار فقط !!! (شفتو ليش أشجعكم تطلبو بنفسكم لا تسمحو لأحد يستغلكم و يقول الشحن غالي ).
لو في إمكانية تطلبي لنفسك و صديقاتك أو أختك معاكي أحسن عشان تتقاسموا سعر الشحن و اختاري الشحن السريع.
الطلب من الموقع كان سهل و بسيط و ما يحتاج تسجيل و للبنات اللي يخافو من طلبات النت ، الموقع آمن و مضمون. عيبه ما فيه لغة إلا انقلش لكن مافي شي صعب ان شاء الله و بوريكم المراحل خطوة بخطوة.
1.تدخلي الموقع www.frankbody.com
و تختاري INT موقع دولي ( لو عندك بريد أمريكي و حابة تختصري مدة الشحن تقدري تشحنيه لبريدك الأمريكي )
2. تختاري المنتج اللي حابته و تضيفيه للسلة add to cart . في عندك أربعة خيارات : مقشر الكوفي الأصلي و سعره تقريبا 55 ريال ، مقشر الكوفي بجوز الهند ( 67 ريال) ، مقشر الكوفي بالكاكاو ( 63 ريال) و مقشر الكوفي بالنعناع ( 63 ريال).
3.تأكدي من محتويات السلة و لو قررتي تطلبي تضغطي على proceed to payment .
أنا طلبت مقشرين original .
4.في صفحة العنوان ، عبي البيانات و حطي عنوانك البريدي الصحيح ( الصندوق البريدي لازم يكون صح عشان ما تضيع شحنتك) لو تلاحظو في خانة الدول أول ما تفتحيها تلاقي السعودية ، الإمارات و الكويت أول شي هههه
5. الصفحة اللي بعدها بيانات بنكية ، بعد ما تحطي كل المعلومات أضغطي على تأكيد الطلب و بيجيكي أيميل فيه رقم الطلب و رقم التتبع لو أخترتي الشحن السريع ( أنصح فيه للمبتدئات ) .
tadaaaaa .....
و خلصنا , أنا لسا انتظر الطلب و أقلكم رأيي. ان شاء الله التدوينة كانت واضحة و مفيدة .
♥♥ يسعدني تفاعلكم
الايميل miramode90@gmail.com
