تجربتي مع فيتامينات تساقط الشعر ماكسي هير Maxi Hair Review ❤





السلام عليكم 


البوست مرة طويل و فيه شرح كثير روحي جيبي قهوتك أو شاهيك و تعالي أقري على راحتك  :)

اليوم بتكلم عن موضوع مرة مهم  للمرأة و مقوم من مقومات جمالها: الشعر
ليا تقريبا 3 شهور و أنا آخذ كورس حبوب لتقوية الشعر و الأظافر الشهير
Maxi Hair Plus و كنت حابة اتكلم عنهم بعد ما اجربهم لفترة طويلة و اكون كونت رأيي عنهم. 



طبعا كنت ناوية اكتب عن تجربتي فقط يعني انا لأيش استخدمته و هل نفعني أو لا لكن حسيت انه نسبة الفائدة حتكون مرة قليلة و تقتصر على
"المنتج حلو انصحكم تاخذوه أو العكس" و أنا ما أسمح لنفسي آخذ دورك انتي أو دور دكتورك و انصحك بمنتج حيأثر في جسمك و خلاياه بحكم انه كبسولات مو مجرد كريم ينحط سطحيا فعشان السبب دا  الموضوع قررت انه يكون تفصيلي و توضيحي بس بشكل غير ممل عشان ما تحسي نفسك تقري في نشرة طبية و يتعمق مفهومك لمشكلة تساقط الشعر و تكوني انتي الحكم في اختيار العلاج اللي يناسبك. 

أولا حابة اوضحلكم طبيعة شعري من باب انه مو كل شي يناسبني ممكن يناسبك؛ شعري طويل لآخر الظهر ماشاء الله ، كثافته متوسطة يعني مو خفيف، فروة رأسي دهنية ، فيه لمعة حلوة بس لو اهملته كم اسبوع يسير باهت
(هذا يبين اهمية العناية المستمرة) ، مشكلتي مع التساقط معقدة شوية شعري ما يتساقط بشكل كبير يسبب فراغات لا الحمد لله لكن كون الشعرة اللي تطيح طويلة فتكون مرة واضحة ليا لما اصفف شعري و يزعجني هذا الموضوع و خلاني ادور شي يقوي بصيلات الشعر عشان يحد من التساقط و يخلي الشعر اللي ينبت اقوى و صحي اكثر.
اللي كان المفروض اسويه هو اني اعمل تحليل دم (بوضح ليش بعدين) و اشوف لو محتاجة فيتامينات أو علاج ثاني لكن قراري كان في فترة انا عندي ضغط شغل كثير و ماعرفت أنظم وقتي ( ناوية اعمل تحليل دم خلال هذا الشهر و احكيكم عن التجربة)
فقررت اني أوقف مكملاتي الغذائية اللي استعملها و آخذ مكملات تكون مخصصة لتقوية الشعر و الأظافر و بدأت رحلة البحث ، و تحمست لماكسي هير بلاس من تجارب البنات الأجانب في الأنترنت و توكلت على الله و طلبته من النت. 



قبل ما اقلكم عن رأيي فيه خلينا نتكلم عن تساقط الشعر وضعفه شوي
عشان ما تستعملي حاجات ما تنفع و تخسري فلوسك ووقتك. 

اهم سؤال هو: هل ممكن تعالجي تساقط الشعر بالفيتامينات؟
أتمنى محد يجيه إحباط بس الجواب هو لا مافي فيتامينات تعالج التساقط و شركات انتاج المكونات الغذائية ممنوعة قانونيا انها تسوق لمنتجاتها بعبارة " يعالج تساقط الشعر " ( ممكن يقفلولهم شركاتهم و يدخلوهم السجن بسبب دا الشي ) ليش؟ لأن تساقط الشعر مو مرض هو مجرد مؤشر لحالة جسمك الصحية " الداخلية " يعني جسمك قاعد يتفاعل مع مشكلة داخلية و تساقط الشعر هو رسالة تنبيهية لوجود خلل داخلي أو تغيير في حالة جسمك لازم ننتبهلها و نعالجها. لو مشكلتك الداخلية هي نقص فيتامينات أو فقر الدم فوقتها الكبسولات بتعالجها و التساقط راح يخف أو يوقف بس لو مشكلتك الداخلية مختلفة ماحتنفعك و لازم تشوفي علاج للمشكلة الأساسية.
من الأسباب اللي ممكن جسمك ينبهك عليها عبر تساقط الشعر هي اختلال الهرمونات ( الحوامل غالبا يعانوا من التساقط في فترة الحمل ) أو استعمال علاج معين ( مثل الروكاتان ) أو مشكلة في الغدد الدهنية الخ. .في دي الحالات الفيتامينات ما حتساعدك أبدا.
طيب كيف أتأكد من سبب التساقط؟ لازم تروحي طبيب يعملك تحليل لمعرفة سبب التساقط و علاجه (و للأسف ثقافة اللجوء الى الطبيب عندنا ضعيفة جدا و دايما نسأل ناس مو متخصصين و نعمل من أجسامنا حقول تجارب لأي منتج عليه مدح و ما نروح للطبيب الا لما نجيب العيد).
 هذه بالنسبة للأسباب الداخلية أما الأسباب الثانية اللي لازم نحطها في بالنا هي أولا الوراثة ( مثلا لو كل اهلك شعرهم خفيف و يتساقط ) هنا صراحة مافي شي كبير ممكن تسويه لأنه مافي علاج آمن و فعال ممكن يتحدى الصبغة الجينبة في جسمك المسؤولة على تحديد صفات الأنسان كالطول و اللون و لون العينين و طبيعة الشعر و كثافته.
 و السبب الثاني هو عنايتك و تعاملك مع شعرك : تكرار الصبغة و الفرد و استخدام المجففات بكثرة و بدون حماية تضعف الشعر و تسبب تساقطه.
 اتمنى تكون النقاط اللي شرحتها لغاية الآن واضحة و نرجع لفيتامينات ماكسي هير. الفيتامينات توفر التغذية اللازمة لشعرك و أظافرك و حتا بشرتك و تخليها صحية و قوية بس لازم ما نعتمد عليها بشكل كلي و نحاول نحسن نظامنا الغذائي ,معروف انه الجسم يمتص الفيتامينات اللي تجيه عن طريق الأكل و يستفيد منها اكثر بكثير من اي فيتامينات تجيه عن طريق مكملات غذائية. فيتامينات ماكسي هير بلاس فيها تركيز على الفيتامين B بجميع أشكاله ( B1, B2, B3, B5, B6 ) و أحماض ال فوليك ( B12 ) : كلها ضرورية لصحة الشعر و بصيلات الشعر و الجلد و تساعد صنع البروتينات اللازمة للشعر. كمان فيها جرعة عالية من البايوتين من أهم الفيتامينات المسؤوولة على نمو الشعر و متواجد طبيعيا في صفار البيض، الكبدة، السالمون و الأفوكادو. ماكسي هير فيها كمان فيتامين A, فيتامين C, زنك و كالسيوم و فيتامينات عديدة مفيدة للجسم و مهمة للتفاعل مع مركبات الفيتامين B.

 هذه صورة لمكونات الماكسي هير بنسبها عشان تكون عندك فكرة عن الفيتامينات الضرورية لصحة البشرة و الشعر و الأظافر و حابة انبه انه لو تستعملي اي فيتامينات ثانية وقفيها عشان الجسم يخزن الفيتامينات الزائدة عن حاجته و لو ما استعملها ممكن تسبب مشاكل صحية توصل للتسمم لا قدر الله. كورس الشعر عادة يكون لمدة ستة أشهر.


أخيرا نجي لتجربتي مع ماكسي هير و ان شاء الله ما توكونوا طفشتوا من كمية المعلومات اللي في الموضوع بس و الله ضروري أوضح كل شي عشان الكل يستفيد و يفهم. أولا شعري من أول شهر لاحظت التساقط قل و سار يطلعلي بيبي هيرز كثير في مقدمة الرأس بالرغم انه من أول مو خفيف و الشي اللي ما توقعته انه شعري سار يطول بشكل اسرع ماشاء الله و قصيت اطرافه لاني ما احب طول شعري يتجاوز الظهر و الشعر اللي يطلع حسيته اكثر كثافة.
 مو عارفة لو الفيتامينات أثر في حالة شعري ( القديم ههه ) صراحة لأنه الشعر اللي ينبت و يطلع من الفروة هو عبارة عن خلايا ميتة ( لو خلايا حية ممكن تغذيها كان محد قص شعره من الألم ) فممكن نحسن مظهره بالعناية و الزيوت بس ماحتقدري تعالجيه من جوا. بالنسبة للأظافر كانت اسرع شي شفت فيه التغيير، بعد اسبوعين ثلاثة سارت أقوى و ما تتكسر بسرعة. بشرتي للأمانة ما لاحظت تغيير كبير فيها ممكن عشان أساسا مرررة مهتمة فيها. بصفة عامة بعد ثلاث أشهر من استعمال ماكسي هير بلاس أنا راضية جدا عالنتائج و مبسوطة اني أخذتها و ناوية اكمل الكورس.
 أكثر سؤال شائع بخصوص المكملات الغذائية :هل هي تسمن؟ السؤال يضحك شوية صراحة لأن المكملات الغذائية مافيها اي سعرات حرارية فمالها اي علاقة بزيادة الوزن و هذه معلومة خاطئة يقع تداولها في المواقع و المنتديات و صدقها الأغلبية.

كمان السؤال الثاني اللي ينسأل كثير هو هل حتكثرلي شعر جسمي؟

من خلال تجربتي صراحة ما أثر في شعر جسمي ووجهي أبدا بس عشان في بنات كثير اشتكوا من هالنقطة ( للأمانة عربيات في مواقع و منتديات فقط ما شفت المشكلة دي انطرحت في تجارب الأجنبيات ) حبيت أعمل بحث عالنقطة دي بالذات في مواقع طبية اجنبية موثوق منها و اللي وصلتله انه المكملات الغذائية مالها اي علاقة بزيادة شعر الوجه و الجسم للمرأة أساسا لأن شعر الجسم و الوجه العامل الوحيد المتحكم فيه بعد الوراثة هي الهرمونات و بالتحديد هرمون الذكورة التستوسترون و ليس للتغذية تأثير على شعر الجسم و الوجه. فعلميا ما في فيتامينات حتطلعلك بصيلات شعر جديدة في وجهك و جسمك و بالتالي ما حتسبب كثافة .ممكن و احتمال بسيط يخلي نموها اسرع بس ما حيكثفه هل دا الشي ممكن يؤثر على جلسات الليزر ما عندي فكرة صراحة أفضل تسألي دكتورك.

 طيب هل في سلبيات لاحظتها في الحبوب؟  صراحة في : أول شي الحبوب حجمها كبير و ريحتها مو حلوة أبدا :( أول ما فتحت العلبة و شميت الرائحة قلت مستحيل أستعملها. لكن ضريبة الجمال ضغطت على نفسي و اشربها مع عصير يضيع الطعم و الرائحة.

 شي ثاني أول يومين من الاستخدام كنت اتبع الارشادات اللي في العلبة مكتوب انه لازم أتناول 4 كبسولات في اليوم و حسيت بصداع مو طبيعي بالرغم اني ماغيرت شي في نظامي الا الحبوب وقتها قررت اني اسمع لجسمي و اخفف من الجرعة الى النص و الحمد لله راح الصداع و لا أثر في مفعول الفيتامينات عشان شفت نتايج حلوة.

من فين اجيب الماكسي هير؟ هو للأسف ما ينباع في الصيدليات لازم تطلبيه من الأمازون أو iherb و في تاجرات يوفروه. العلبة فيها 120 كبسولة ب70 ريال تكفيكي 3 أشهر لو حتستعملي اربع كبسولات (ما انصح فيها صراحة عشان الجرعة مرة قوية) أو تكفيكي كورس كامل لو حتكتفي بحبتين في اليوم. سعرها مرة حلو و مناسب مع الشحن ممكن توصل ل 100 ريال لو عندك فيزا و صندوق بريد و حابة تطلبيها بنفسك. لو حتطلبيها من التاجرات حيكون أعلى من سبعين حسب عمولة للتاجرة .
انا عن نفسي طلبت من هنا

(غثيتكم بالموقع ترا ما اشتغل معهم ههههه من جد اكثر موقع احب التعامل معهم ثقة و كل منتجاتهم جودتها رائعة اتعامل معاه من 2013 ، لو حابين اعملكم بوست عن الموقع و كيف أطلب منه اكتبولي في الانستغرام)

 طريقة التسجيل  و الطلب من موقع iherb ❤

و كدا اكون خلصت البوست هذا. أتمنى من كل قلبي يكون مفيد خاصة للي تدور حل لمشكلة تساقط الشعر. 

 يسعدني تفاعلكم 

 عبر  الإنستغرام   miramode90

 الايميل  miramode90@gmail.com

22 comments

  1. مععلومات مفييد قبل الواحد ما يششتري
    شكرا لكك

    ReplyDelete
  2. يعني ١٢٠ حبه تكفيني شهرين اذا اخذت حبتين باليوم يكفي علبه وحده بهالحاله او اخذ علبتين

    ReplyDelete
    Replies
    1. صح حبيبتي لو تاخذي حبتين في اليوم علبة وحدة تكفي ❤

      Delete
  3. انا من يومين اخذت الحبوب من الصيدليه اللي جنبنا وبديت فيه واتمنى يفيدني لان شعري وااايد يطيح

    ReplyDelete
  4. ف معلومات مرا مهمة فادتني بشكل ف شكراً 💜

    ReplyDelete
  5. يعطيك الف عافيه
    هل بصلح للرجال في حال التساقط الكثيف الغير وراثي

    ReplyDelete
    Replies
    1. و عليكم السلام .. طالما متأكد ان التساقط مو وراثي فتصلح للرجال و تعتبر مكمل غذائي و أنصحك ب Maxi Hair men مخصص للرجال من نفس الشركة أتوقع نفس التركيبة مع اختلاف تركيز بعض الفيتامينات متوفر في موقع اي هيرب

      Delete
  6. طيب ياعسل متى بالزبط تاخدي الحبتين ؟؟ مع الاكل ولا بعد الاكل ؟؟؟ وطالما عيا حبتين يعني مع الغداء والعشاء؟؟؟ صح كدا ؟؟


    وسؤالي التاني .. الكورس عبارة عن كم شهر ؟؟؟ عشان يكون اسمي خلصت الكورس كامل المفروض استخدمو لمدة كم ؟؟

    ReplyDelete
  7. حابه أشتريها وشكرا على تجربتك
    أفدتيني مره يعطيكي العافيه

    ReplyDelete
  8. This comment has been removed by a blog administrator.

    ReplyDelete
  9. علبة فيها 120 حبة لو اخدت حبتين فاليوم يعني حتكفيني شهرين بس
    انتي كاتبة 3 شهور
    يعني لو كورس كامل 6 شهور ححتاج 3 علب صح ؟

    ReplyDelete

  10. انا اخذت ماكسي هير العاديه واخذ حبه في اليوم مع انو مكتوب ثنتين بس
    ماحبيت اثقل على نفسي بس من بكرا ان شاء الله باخذ ثنتين
    تحسن شعري جد بس انا اسوي ثانيه مع بعض زدت الترطيب وعملت انفيرجن ميثود
    الطول واضح لانو شعري كان يطول مرا على مايطول عقدني طوله بس دحين الحمدالله
    بدا يطول الشي الي مالاحظته واشتريت الحبوب عشانه الي هو الكثافه ش
    شعري السنوات الاخيره قل بشكل ملحوظ ودي مي طبيعة شعري الحمدالله التسقاط قل جداً
    ماطلع شعر جديد عشان كذا اباخذ ثنتين في اليوم واشوف كيف يارب يكثف
    شي ثاني عن دي الحبوب ( الله يكرمك البول يطلع لونه فسفوري ) لما ثريت عنه لقيت انو يب كثير لاحظو نفس الشي
    بس عادي هوا لما يكون فيه مواد مطروحه اكثر من الجسم يغمق لونه كذا
    انا ارتحت صراحه لانو معناته اذا فيه شي جسمي مايحتاجه بيطلع
    مدري اذا صار لك نفس الشي
    <- تحمسي بالكلام و طولت سوري

    المهم حبيت مدونتك ماشاء الله وبحطها عندي بالفيفورت

    موقع ايهرب ماما تقولي مشغلينك هما مندوبة مبيعات واحنا ماندري =)
    صراحة موقع فضيع دايم اجيب لماما اشياء منو وابلشها الا تستخدمها
    =D

    ReplyDelete
    Replies
    1. ^
      ^
      ياكثر الحروف الي بلعتها $=
      غضي الطرف عنهم

      Delete
  11. السلام عليكم
    حبيت أسال هل ﻻزم اسوي فحوصات قبل أخذ الحبوب؟مع إنوا عندي اكثر اﻻعراض إللي تخليني أتناول الحبوب؟
    وإيش هي الفحوصات؟
    و إذا سويتيها ممكن تكتبي كم كلفتك؟

    ReplyDelete
  12. السلام عليكم ورحمة الله وبركاته
    شكراً على الموضوع الجميل ، حبيت اسألك انا عمري ١٧ تقريباً ينفع اخذها ولا لازم عمر اكبر اتمنى تفيديني من هذه الناحية وشكراً

    ReplyDelete
  13. رائعه نتائجها لكن ماقدرت اكملها لانها سببت لي صداع فظيع :(
    ف افكر اني اقلل الجرعه ل كبسوله وحده يوميا

    ReplyDelete
  14. بعد ما تركتي الحبوب رجع شعرك زي ما كان ؟

    ReplyDelete
  15. بينفع للرجال خاصة الي شعره خفيف وفي صلع خفيف ؟
    شكرا

    ReplyDelete
  16. هل ينفع استخدمها في الوقت الحالي مسوي زراعه شعر للدقن ولي 17 يوم من العمليه ؟

    ReplyDelete
  17. ضوقري بتتكسر وشعري بينزل وعندي 20سنه ينفع اخدوا

    ReplyDelete

تعليقاتكم الجميلة ❤

Related Posts Plugin for WordPress, Blogger...