روتين عنايتي بيديني

♥ السلام عليكم

                               اليوم بتكلم عن موضوع مهم جدا للبنات و دايما انسأل عنه : عنايتي بيدي واضافري

٠١ الحماية

تعرفوا مقولة الوقاية اهم من العلاج ؟ هذي تنطبق على العناية بالبشرة بصفة عامة  لانك تقعدي بالأشهر تعوضي اهمال كم اسبوع (الاختبارات مثلا).

بالنسبة لليد فهي تتعرض لعوامل كثيرة تأثر في صحتها و لونها اهمها الشمس و الماء الحار+منتجات التنظيف. الشمس الكل صار عنده وعي بمخاطرها و انه لازم يحطوا واقي كويس لكن الكفوف يا بنات ضروري ضروري تحطيلها الواقي خصوصا بنات الجامعة اللي نص يومها في الشمس لا تستهينوا بهالموضوع ابدا ، الشمس مثل ما تضر وجهك فهي تضر يدك. 
الماء الحار و منتجات التنظيف للأسف ما منها مفر (يا ريت هههه )) ، ما حتهملي بيتك و تخلي المواعين مكدسه عشان تحافظي علي يدك بس  ممكن تحميها بلبس القلافز المخصص للتنظيف عشان المواد الكيميائية اللي في المنظفات تحرق يدك و تكسر الأظافر و تضعفها فلا تلمسي المواعين أو المساحيق إلا و عليكي قلافز. بعض البنات يشتكو انها تضايقهم و ما يعرفوا يشتغلو و هما لابسينها بس صدقيني هي مسألة تعود فقط لما تصير روتين ما حتحسي فيها ابدا.

٠٢ الترطيب

لازم تحطي في بالك شي مهم : بشرة مرطبة كويس يعني بشرة صحية و صافية و الترطيب يبدأ من الداخل بشرب الماء بإستمرار  ولازم المرطب يصير معاكي في كل مكان (وحده مهووسه بالترطيب، اشوف قدامي مرطب لا اراديا افتحه و احط منه حتا لو مو ليا ههه) ، إشتري مرطبات كثيرة و حطي واحد في الشنطة ما يطلع منها، واحد جنب السرير ، مرطب عند المغاسل (مررررررة مهم) وواحد عالتسريحة عشان تتذكري ترطبي يدك و انتي تجهزي نفسك. 

بصراحة المرطبات انواع و اشكال في الأسواق بس مو تستعملي اي مرطب و السلام، أول شي المرطبات التجارية فاشلة للأسف و ما تسوي اي شي لليد غير ترطيب خفيف مؤقت و ريحة. المرطبات اللي فيها عطور ممكن تسبب اسمرار للبشرة فلا تكثري من استخدامها و لازم تعتمدي على المرطبات الطبية لأنها تعالج و تغذي البشرة.
انا اكثر مرطبين استخدمهم و ابدا ما اتخيلني بدونهم مرطب رييف دو مييل بالعسل من نوكس (تكلمت عنه في الانستغرام )
و مرطب عميق من يوسيرين .
مرطب نوكس فيه عسل و زيوت طبيعية و فيتامينe , ريحته مرررة حلوة و ترطيبه عميق تمتصه البشرة بسرعة و من اول استخدام تحسي بشرة اليد تصير ندية و فيها لمعه.
مرطب يوسيرين ترطيبه اعمق و بدون روائح تماما فمناسب للي بشرته حساسه ولا عنده اكزيما مثل ما قريت في النت.
استخدمت فازلين الوردي للعناية ياليد و الأظافر و ما حبيته ابدا حسيته لزج و مرررة خفيف و ريحته مزعجة. 

في الليل اعتمد الزيوت و الزبدات الطبيعية للترطيب العميق. قبل لا انام احط اي شي متوفر و افضل شي شفت نتايجه زيت الزيتون يفتح لون الكفوف و زبدة الشيا و ساعات احط فازلين على الأظافر يقوويها.

٠٣ التقشير

لازم كل اسبوع تقشري كفوفك مرة عشان تشيلي الجلد الميت  ، تخلطي ليمون+زيت زيتون+سكر و تفركي فيها كفوفك و مع تكرار الاستعمال حتخلصك من اسمرار المفاصل بس يبغالها شوية صبر و استمرار. 

ممكن كمان تجيبي اي مقشر جسم جاهز عندك و تستخدمي منه لكفوفك. بعد التقشير ضروري نستخدم مرطب قوي عشان ما تكون النتيجة عكسية. 

٠٤تقوية الأظافر

في منتجات كثيرة و فيتامينات تستخدم لتقوية الأظافر انا استخدم حبوب  الأوميغا3 بشكل يومي و كمان استخدم حبوب Maxi Hair  و ناوية اخصصلهم بوست كامل عشان بنات كثير يسألو عنهم.  ( كتبت الموضوع هنا  )
و اهم شي بنات لازم نتذكر انه حالة البشرة و الشعر و الأظافر يتأثر كثير بالأكل اللي نستهلكه فلو تعاني من تكسر الأظافر بسرعة أو انها ما تطول حاولي تراجعي اكلك و تعتمدي ع الفواكه  والخضروات و الأكلات الصحية لأنه مهما حطيتي منتجات غالية ما حتشوفي نتيجتها لو نظامك الغذائي سيء.

٠٥تبييض الأظافر  

ساعات الأظافر يصير لونها باهت و أصفر خاصة لو ما تستخدمي واقي او بيس قبل المانيكير و عشان يرجع لونها ابيض و تصير نظيفة و تلمع انا استخدم فرشة اسنان مخصصتها لأظافري و شوية معجون اسنان و افركهم مرة او مرتين في الأسبوع.  و لازم تقصي الجلد حول الأضافر كل فترة و ترتبيهم لوحدك أو في الصالون مرة في الشهر (لا تستخسري الدلع في نفسك و اتذكري انه انوثة المرأة تبدأ من تفاصيلها الصغيرة زي اليدين و الأقدام و الأظافر)

و خلصنا البوست الطويل اللي حاولت اشمل فيه كل ما يخص العناية باليدين و الأظافر من خلال تجربتي. اتمنى تستفيدوا منه 

♥♥ يسعدني تفاعلكم 

 عبر  الإنستغرام   miramode90

 الايميل  miramode90@gmail.com