تجربتي لسيروم تفتيح ❤❤ The Body Shop drops of light serum

اليوم التدوينة بتكون على سيروم نزل في السنة الاخيرة في محلات بودي شوب و بسعر جدا معقول مقارنة بالسيرومات اللي في السوق . أخذته من كم شهر بدون تخطيط و مالقيت عليه ريفيوز كتير في البلوقز بالعربي عكس الأجانب فقررت     أني اكتب عنه بالتفصيل هنا

"Instagram famous"

قبل ما ابدا ملاحظة شي في الفترة الاخيرة ، الهَوس بالمحلات اللي مالها فروع عندنا يخلي كل التركيز على هالمنتجات اللي سارت مشهورة في الانستقرام و الكل يركز على طريقة الحصول عليها بعض النظر عن وجود بدائل او منتجات تفي بالغرض في الاسواق؛ انا كمان أتحمس الأشياء المعروضة و احاول اطلبها اونلاين او ألاقي احد يوفرها لي بس الفترة الاخيرة بعد سلسلة من خيبات الأمل في منتجات اخدت سمعة و صيت عالفاضي و اسعارها وصلت الدبل سرت احاول ألاقي في المنتجات المتوفرة او حتى اللي أسويها بنفسي الشي المناسب و ما اشتري الا الشي اللي مقتنعة انه بيناسبني .

هالسيروم ما كان من قائمة مشترياتي بس لما جربته و قريت مكوناته في المحل مره تحمست له ؛ أولا يجي في علبه بيضاء أنيقة تعزل النور عشان تحمي المكونات من التأكسد و تجي بشكل قطّاره لتسهيل توزيع السيروم . ريحته ريحة ورود فرش و منعشة و طبيعية مافيها اي ريحة صناعية مزعجة . و قوامه مائي و خفيييف كانه مافيه اي زيت . استخدمت هالسيرم لمده شهر كامل في الليل تحت المرطب و في النهار تحت الميك اب و ما سببلي اي حبوب او دهون و لا يخلي الفاونديشن يسيح بالعكس , يرطب و استخدمته بديل البرايمر لان البشرة تمتصه بسررعة  و يعطي ترطيب و يخلي البشرة جاهزة لتوزيع الفاونديشن 

طيب نجي لمكونات السيروم و وظيفته ؛ السيروم يستهدف البشره التعبانة الي فيها آثار و أماكن داكنة و يعمل على تفتيحها و إعطاء البشرة إشراق و نضاره و  طبعا كأي سيروم تفتيح من مكوناته لازم نلاقي الفيتامين سي.هالسيروم فيه  فيتامين سي على شكل

3-O-Ethyl Absorbic Acid

و يعتبر من اكثر أشكال الفيتامين سي فعالية لتعطيل تكون الميلانين المسبب للتصبغات و من وظائفه أيضا مساعدة انتاج الكولاجين في الخلايا ، الفيتامين سي في هالسيروم موجود في اعلى قائمة المكونات يعني نسبته جدا عالية و ممكن يكون فعال لتوحيد لون البشرة.

من المكونات اللي لفتت انتباهي كمان خلاصة الطحالب الحمراء

Palmaria Palmata Extract

و هالخلاصة في دراسات علمية تؤكد انها تعطّل عمل إنزيم المسؤول عن تكون التصبغات في البشرة و الكثير من الشركات العالمية زي تاتشا و لوريال تعتمد هالمكون في منتجاتها

من الأشياء اللي خوّفتني في السيروم وجود شكل من أشكال الكحول في رأس قائمة المكونات و بالرغم انه  موجود في تقريب كل الكريمات و منتجات البشرة بغرض التعقيم و التخفيف من كثافة المنتج و لزوجتيه الا أني ما أفضِّله كتير و الحمد لله ما سببلي اي تحسس و لا تهيج و لا جفاف بالعكس السيروم يرطب البشرة و يطرِيها 

طريقة استخدامه جدا بسيطة ، على بشرة نظيفة نوزِّع نقطتين أو ثلاثة و نسوي مساج خفيف في الصباح و بعده واقي الشمس و في الليل و بعده كريم ترطيب او لوحده

جربته شهر كامل مرتين في اليوم و نتيجته جدا عجبتني من ناحية تفتيح البشرة و تفتيح الأماكن الداكنة اللي في العادة لو طلعت حبة يروح اثرها بعد فتره أطول ، اكيد هو مو سحر و لا هو مقشر للبشره لكن مكوناته تركيبته و سعره من أفضل الموجود في السوق للبنات اللي تدور على شي يفتح و يعطي نضاره او سيروم يكون فيه فيتامين سي و بسعر مناسب

العلبة فيها ٣٠ مل و سعرها ١٢٩ ريال ؛ الجميل في المنتجات اللي سعرها في المتناول انك تقدري تواصلي عليها و تستمري في استخدامها لان في كتير كتبولي في موضوع سابق انهم يشتروا سيروم ب ٦٠٠ ريال و اكثر و ما سوا لهم شي ناسيين ان اي منتج او خط عناية يبغاله استمرار و في أشياء تتغير في الخلايا ما نشوفها بالعين المجردة لكن نتائجها تظهر بعد سنين سواء إيجابية او سلبية

اخر شي برجع اشتري هالسيروم اكيد بس بعد ما اخلص سيرومين عندي كمان فيتامين سي  . و هالشي هو اللي حبيت أوضحه في نقطة خط العناية ؛ عنايتي اليومية تعتمد على سيروم فيتامين سي فلما أبحث عن منتجات جديدة أجربها احرص انها تعتمد على نفس الخط اللي معتمدته و مكوناته ما تعارض المنتجات اللي حستخدمها بعده او قبله من مقشرات و مرطبات.

دمتم بحب و اشوفكم قريب في موضوع عناية جسم ❤️