السلام عليكم ♥
اليوم بتكلم بشكل سريع عن الماسكات الجاهزة و تجربتي مع بعضها. كلمتكم قبل عن أهمية انه يكون عندك منتجات عناية جاهزة عشان ما تلاقي عذر لنفسك و تستثقلي انك تسوي خلطات و ماسكات. و قلنا انه لازم تخصصي وقت في روتينك الأسبوعي
للعناية المكثفة
♥ لو ما عندك روتين و حابة تتعلمي كيف تبدئي شوفي موضوعي هنا بيفيدك
الماسك أو قناع الوجه يعتبر عناية مكثفة بالوجه ، مرتين في الأسبوع تكفي عشان تعطي وجهك التغذية اللي يحتاجها لمعالجة مشاكل الإرهاق و الجفاف الخ
حتا لو بشرتك حلوة و مافيها مشاكل تحتاجي الماسكات
أهم شي في اختيار الماسك اللي يناسبك هو تحديد احتياجات بشرتك . هل هي جافة و تحتاج رطوبة ؟ هل فيها تصبغات؟
حتا لو بشرتك حلوة و مافيها مشاكل تحتاجي الماسكات
أهم شي في اختيار الماسك اللي يناسبك هو تحديد احتياجات بشرتك . هل هي جافة و تحتاج رطوبة ؟ هل فيها تصبغات؟
انتي حددي ايش حابة الماسك يعملك حسب نوع بشرتك و اختاري : بعطيكم امثلة بدون ما أقيدكم باختيارات معينة لأن هدفي كل وحدة تسير تفهم لبشرتها بنفسها و تختار اللي يناسبها
أفضل ماسكات للبشرة الدهنية هي ماسكات التنظيف العميق لأنها تنظف المسامات. منها ماسكات الطين و ماسكات التوت البري و ماسكات النعناع و شجرة Detoxifying أو deep cleansing الشاي. تلاقي عليها الوصف
أفضل الماسكات للبشرة الجافة هي ماسكات الترطيب لأن الجفاف يسبب اسمرار و يساهم في ظهور التجاعيد بسرعة .الماسك اللي يعتمد عالترطيب تحسي معاه بنتيجة .Moisturizing فورية بشرة مترطبة و ناعمة. تلاقي وصفه
أفضل الماسكات للبشرة الباهة هي الماسكات اللي تجي فيها حبوب صغيرة للتقشير: تحطي على وجهك مثل الماسك و لما تجي تغسليه الحبوب تعملك تقشير خفيف
.Exfoliating mask أو radiance mask تلاقي وصفها
البشرة العادية ( بشرتي) انتي محظوظة عشان ممكن تختاري اي ماسك
يعجبك حسب نظام عنايتك . بتشوفوا عندي ماسكات للبشرة الدهنية اعتمدها لما أكون حابة اعمل تنظيف عميق و ماسكات ترطيب و ماسكات ديتوكس ، حسب مزاجي
وحالة بشرتي وقتها
ممكن تختاري ماسك واحد فقط و تشوفي عليه نتائج أهم شي الاستمرار و اعتماد الماسكات الجاهزة لا يلغي ابدا أهمية الماسكات الطبيعية لكن يختصر الوقت و الجهد لما ما تكوني فاضية
بتكلم عن تجربتي مع كل ماسك بالتفصيل:
1.ماسك النعناع Queen Helen Mint Julep
من أشهر و أرخص الماسكات في العالم (4 دولار و يطول معاكي أكثر من سنة)
أول شي الشركة المصنعة ما تستخدم أي مكونات كيميائية ضارة في منتجاتها . المكون الأساسي للماسك هو الطين اللي يساعد على تنظيف المسامات و امتصاص الزيوت الزائدة من الوجه. ريحته نفس ريحة النعناع . أول ما ينحط عالوجه تحسي انه يلسع شوية و يعطيكي انتعاش مو طبيعي. ينحط على بشرة نظيفة لمدة ربع ساعة .
لو بشرتك دهنية استخدميه مرتين في الأسبوع. أنا مثل ما ذكرت بشرتي عادية و أستعمله مرتين في الشهر لما احس اني محتاجة تنظيف عميق أو لو تطلعلي حبة أو اثنين (احم احم) ، بعد ما احطه احس وجهي منتعش و ناااعم ، يصغر المسام بشكل ملحوظ أو يمكن عشان ينظف المسام فيعطيها مظهر اصغر. ألاحظ انه يجفف بشرتي شوية فأستعمل بعده مرطب كويس و أقوم الصباح ببشرة فرش و نظيفة.
علبته أقتصادية جدا و ممكن تخليه في الشاور بدون ما يخرب من الرطوبة.
2. ماسك الطين الهندي Aztec Secret
من أكثر الماسكات اللي عليها تقييم عالي في المواقع العالمية و الشركة المنتجة توصفه بأنه "أكثر قناع فعال في العالم"، هو عبارة عن طين هندي طبيعي مجفف تحت الشمس بدون أي إضافات أو عطور . مناسب لكل أنواع البشرة لأنه ما يسبب تهيج لكن أكثر النتائج المبهرة شفتها عند أصحاب البشرات الدهنية اللي فيها حبوب. شفت صور قبل و بعد من المستخدمين و انصدمت من فعاليته.
علميا ماسك الطين غني بالمعادن الطبيعية، لما ينحط عالوجه يكون طاقة سلبية negative تمتص الأوساخ و السموم اللي في البشرة لأن طاقتها إيجابية positive.
للبشرة الدهنية يخلط مع خل التفاح و للبشرة الجافة و العادية يخلط مع ماء (أنا أحط معاه ماء الورد) .
وظيفته تنقية البشرة و تنظيف المسام و ينفع لكل الجسم مو بس الوجه ( فضيع للجسم بعد الحمام المغربي). أول ما تحطيه تحسي وجهك مشدود و ينبض و بعد عشرين دقيقية تغسليه بماء دافي و استمتعي ببشرة نظيفة من قلب. (ممكن وجهك يقلب أحمر لمدة نص ساعة بس طبيعي جدا )
علبته كبيييرة نص كيلو ب 6 دولار يعني ما يخلص أبدا.
أنا بشرتي عادية و مافيها حبوب بس حبيت نتائجه احس وجهي يسير افتح و المسامات نظيفة ، حتا المكياج في اليوم اللي بعده غيير يكون مرتب و ما أحتاج احط كثير .كمان أستعمله في ماسكاتي الثانية اللي بس أضيف ملعقة عشان فوائده .
أنصح فيه مرة خاصة للي يعانوا من مشاكل البشرة الدهنية لأن تجارب الأجانب الي قريتها تحمس جدا.
3.ماسك السكر الأسود Skin Food Black Sugar
الماسك معروف من الشركة الكورية Skin Food. اشتريته على مدح البائعة في المحل، قالتلي اكثر ماسك مبيعا عندهم. هو عبارة عن ماسك مقشر يعمل على تقشير و و ترطيب البشرة. أحسن شي فيه أنه يوفر لك تغذية للبشرة بالمعادن و الفيتامينات و حمض الجليكوليك و لما تجي تغسليه الحبوب تعملك تقشير خفيف. حبوب السكر اللي فيه لطيفة على البشرة و تذوب مع الماء. أحب أستعمله لما يكون عندي طلعة مهمة و حابة احط فاونديشن و يطلع برفكت. اللي لاحظته يخلي الأساس يتوزع بسهولة و ما يتكتل و لا يسبب خطوط أو قشور. أحس انه هذا أهم شي في العناية بالبشرة. البشرة الجميلة المفروض تسهل عليك مرحلة الميك اب و تخليه يطلع مرتب بدون الحاجة للمثبتات و البرايمر و غيره.
عجبني الماسك جدا و من الحاجات اللي برجع آخذها ان شاء الله. Skin Food عندهم محل في دبي و كمان التاجرات يوفروه بسعر 55 ريال تقريبا.
اللي جنبه على شكل خلية نحل عينات جتني ببلاش كريم مساج بالعسل احطه بعد ما اغسل وجهي من الماسك و أعمل مساج خفيف لمدة خمس دقايق و حبيته مرة احس تمتصه البشرة و يخليها مرطبة. ممكن أجيب منه بس تفضى شوي من كريماتي.
اللي جنبه على شكل خلية نحل عينات جتني ببلاش كريم مساج بالعسل احطه بعد ما اغسل وجهي من الماسك و أعمل مساج خفيف لمدة خمس دقايق و حبيته مرة احس تمتصه البشرة و يخليها مرطبة. ممكن أجيب منه بس تفضى شوي من كريماتي.
4.ماسك لاش Lush Brazened Honey
هذا الشي أخذته بالغلط بس حبيته بشكل مو طبيعي.
خليني أكلمكم شوي عن ماسكات لاش، هي ماسكات فرش و مكوناتها طبيعية (فواكه و عسل و مكسرات و زيوت مفيدة) و كلها مذكورة بالتفصيل في موقعهم.
يعني لو ما عندك وقت أو ما تحبي الخلطات بشكل عام الماسكات اللي عند لاش بتختصر عليكي وقت و جهد كثير. طبعا الماسكات فرش لازم تحتفظي بيها في الثلاجة و تخلصيها في مدة ما تتجاوز شهر واحد عشان ما يخرب. لو ما بتحطي الماسك مرتين كل أسبوع لا تفكري تاخذيه و تخسري فلوسك عالفاضي. عندهم أنواع كثيرة تناسب جميع أنواع البشرة. كنت دايما آخذ ماسك اسمه catastrophe cosmetic بالتوت أحسه يجدد البشرة و يريحها و أستعمله بعد ما أرجع من الدوام ، آخر مرة بالغلط أخذت الماسك دا بالعسل و الزنجبيل ، قريت إنه ينظف بعمق و مناسب للبشرة الدهنية و يعالج الحبوب . ترددت في الأول عشان بشرتي عادية و ما كنت حابة شي ينشفها بس أول ما غسلت وجهي حسيت بالفرق . عارفين احساس انك نايمة عشر ساعات و قايمة الصبح تفطري عصير و فواكه و بشرتك منتعشة و صحية ؟ نفففففس الإحساس هذا و انا حاطته في الليل بعد يوم كرف محترم. أخذته من أسبوع و أستعمله ثلاث مرات و حاسة اني بخلصه قبل ما ينتهي الشهر.
Lush صار له فروع كثيرة ، و محلاتهم تجيب السعادة ♥ مستحيل تدخليه بدون ما تطلعي شارية شي ، لو حابة تجربي شي من منتجاتهم أنصحك بالماسكات الفرش .
5 (ماسكات كورية) Sheet masks
ما عرفت ايش اسميهم بالعربي، عالعموم هي ماسكات تجي على شكل كيس فيه سائل و قناع قطني عشان يتشرب السائل المغذي. تفكيه و تحطيه على وجهك (في له فتحات للعين و الأنف) . السائل اللي جوا حسب الماسك (ترطيب، تفتيح،نظارة الخ..) و متوفر عند كل الشركات الكورية. أحسهم عمليين و أفضل اللي تجي للترطيب . أكثر شي استخدمهم وقت السفر . في الطيارة لو الرحلة طويلة أفك ماسك و احطه على وجهي لمدة نصف ساعة و بعدين امسح السائل الباقي بقطنة و بشرتي ما تنشف و لا يبان فيها تعب السفر. أتوقع المتاجر اللي تبيع المنتجات الكورية توفرها .
و بكدا خلصت كلامي عن مجموعة ماسكاتي للعناية بالبشرة.
ان شاء الله يكون موضوع مفيد للجميع.