طريقتي في تعطير شعري ♥

السلام عليكم  ♥

تدوينتي اليوم بتكون عن طريقتي في تعطير شعري و أجمل عطور الشعر اللي جربتها.

أول شي أتوقع الكل يعرف أنه النظافة و الريحة الحلوة من أهم مقومات الطلة الأنيقة و ما ينفع نهتم باللبس و الاكسسوارات و و المكياج و التسريحة بينما الشعر ريحته سشوار (séchoir) أو زيوت .. فحبيت اني اكتب تجربتي الشخصية و أسهل طريقة لتعطير الشعر.

لو المناسبة اللي أتجهزلها صغيرة وفي النهار ؛ألف شعري بالمنشفة و أحط مكياج الين شعري ينشف 50% يعني لسا رطب بس مو يقطر عشان تثبت ريحة العطر ؛ و أبخ على الأطراف و على الشعر من تحت العطر اللي اخترته أو احط نقطتين زيت عطري أو مسك على كفي و أمسح على أطراف شعري على الجهة الداخلية المقابلة للرقبة و أرجع ألفها بالفوطة .

وقت التسريح أو السشوار مع الحرارة الريحة تنتشر بزيادة و تكون فواحة و بعد ما أخلص  بس بختين خفيفة من العطر و صدقوني الريحة بتلزق يوم كامل بهالطريقة و كل ما حركتي شعرك تفوح ريحة جميلة ♥♥ . 

من الخطأ اننا نعطر الشعر بعد الفير أو السشوار عشان خلاص ريحة الحرق تكون موجودة و لما تختلط بريحة العطر ما تطلع حلوة.
و في المناسبات الكبيرة أسوي نفس الطريقة بس أبخر شعري بكسرة عود تناسب العطر اللي حطيته . 

و بس بهالطريقة دايما تبقى ريحة شعري جميلة و مميزة . العطور المخصصة للشعر خالية من الكحول و المواد الضارة بالشعر فثباتها يكون أخف من العطور العادية .

حطيت في الانستقرام ريفيو بسيط للعطور اللي أستخدمها حاليا لشعري و بتكلم كمان عن العطر الزيتي الجميل من بودي شوب.

العطر الزيتي من بودي شوب Indian night jasmine perfume oil

ريحته شرقية ، مزيج من الياسمين و العود الخفيف ، ينفع لوحده أو مع البخور , من أجمل العطور الزيتية اللي جربتها من بودي شوب .

عطر الشعر من ديور  Miss Dior Parfum pour les cheveux

العطر مره فرش و هادي و يقطر نظافة و نعومة ؛ الكثير يفضل الخمريات القوية اللي تبقى ريحتها يومين في الشعر بس أحس هالنوع ما ينفع لكل مكان و لكل مناسبة ؛ الجمعات البسيطة و الطلعات النهارية  دايما أفضل الروائح الهادية و الناعمة و أبتعد عن الخمريات الزيتية الي تجي على عود أو بخور.

هالعطر  هادي و نعوم بس مرره مميز و يثبت  في الشعر المبلول و يطول ؛ حبيته مره بالرغم اني متعصبة لشانيل في عطور الشعر . النوتات اللي أشمها فيه اكتر شي الباتشولي و الماندرين و الورد .
أخذته من سيفورا سعره تقريبا 260 ريال و حجمه ثلاثين مل

عطري المفضل Chanel Coco Mademoiselle Hair Mist 

ممكن يكون رأيي غير حيادي لأني من عشاق عطر شانيل مادموازال ؛ فأول ما شفت عطر الشعر أخذته بدون تفكير و الحمد لله ما خيب توقعاتي.
هالعطر مفضل عندي لأنه يمشي مع عطور كثيييرة و مع البخور يطلع شي فاتن .. ريحته قريبة جدا من ريحة العطر الأصلي لكن أخف و ناقصه المسك .
هالعطر هو تعريف للأنوثة بالنسبة لي ، جدا ناعم و انثوي و أحب نفسي أكتر لما أحطه . أول ما أحطه اشم ريحة فرش و منعشة ، بس بعدين تبدأ تطلع النوتات الزهرية و الشرقية بشكل أنيييق ..
ينفع لكل مناسبة و لكل وقت صراحة خاصة  لشهر العسل .
في شي ما شفت أحد يتكلم عنه أبد و هو تأثيره على الشعر ؛ في كاونتر شانيل البنت قالتلي انه ينعم الشعر و يعطيه لمعة و أنا أعطيتها النظرة اللي خلاص ترا بشتريه مو لازم النصب و الترفيع هههه و فعلا لما قريت عنه في موقعهم لقيت أنه من مكوناته في مرطب خاص للشعر يعطي لمعة و يمنع الجفاف للأطراف و لاحظت هالشي بنفسي .
طبعا ثباته و فواحانه يعتمد على طبيعة الشعر و طريقة التعطير بس أشوف خمس الى ست ساعات جدا مناسب لعطر آمن و غير مؤذي للشعر, سعره في حدود ال 270 من سيفورا

من شركات العطور الأخرى اللي طرحت عطور مخصصة للشعر و حاطتها في الويش ليست للتجربة بعد ما أخلص عطوري : عطر نارسيسو و عطر فلاور بومب . و بالنسبة للعطور الزيتية أو الخمريات فالخيارات كثيرة جدا و متوفرة عند عبد الصمد القرشي ، الماجد ، زهور الريف ...

لو جربتو عطر شعر مميز شاركونا في التعليقات ..
تفاعلكم يسعدني ♥♥