العناية وقت الدورة الشهرية بعيدا عن الخزعبلات المنتشرة

السلام عليكم  ♥

اليوم حابة أتكلم باختصار عن العناية وقت  الدورة الشهرية/ البيريود

- أكيد بتتوقعوا أكتبلكم لسته طويلة عريضة من المهام و قائمة للممنوعات . طبعا لا  , الموضوع أبسط و أسهل بكتير من اللي يتصوره البعض و ما يتطلب اهتمام مبالغ فيه لأن جسمنا مهيء بطبيعته للدورة الشهرية و نحتاج بس معرفة بعض الأساسيات. 

- عدم لبس شرابات و شبشب أو المشي على الأرضية مو كويس لا وقت الدورة و لا غير وقت الدورة لأنه يسبب خشونة في الأقدام و تشققات و يجفف كعب القدم بشكل قوي. ماله دخل في حالة الرحم و لا مرتبط فيه. .

-  تجويع الجسم لساعات طويلة يسبب صداع و ارهاق و يضعف من عملية الأيض الطبيعية و يدفع الجسم إلى استمداد طاقته من الكتلة العضلية فلازم دايما سواء في وقت الدورة أو غيره نحرص على تناول وجبات منتظمة و سناك خفيف من فواكه أو مكسرات لو جعنا .

-  شرب الماء مهم بشكل ما تتصوروه للبشرة و الجسم و في وقت الدورة الجسم يخسر سوائل كتير فلازم نحرص على شرب كميات أكبر من الماء لتجنب الجفاف . المشروبات الغازية و القهوة فيها نسبة كافيين عالية ممكن تزيد آلام الدورة للبنات اللي يجيهم ألم في البطن و تشنجات خلال هالوقت .

- بعض الأكلات اللي نقرأ انها ممنوعة فترة الدورة ما تأثر في الرحم لا من قريب و لا من بعيد لكن يفضل تجنبها لأنها غالبا تسبب انتفاخ للبطن اللي أساسا يكون يألم في هالفترة ,الورقيات و السلطات فيها كمية حديد مهمة للجسم فاللي أكلها أساسا صحي و فيه أسماك و سلطات و لحوم حمراء ما يحتاج تتقيد باكل معين و تقدر تعيش حياتها طبيعي في فترة الدورة.

- لبس شي يدفي و عدم التعرض لهواء بارد مهم لتجنب آلام المفاصل و الظهر لكن بالشكل المعقول و الغير مزعج ؛ يعني صيف و حر لو تضايقك الملابس الثقيلة اكتفي ببنطلون مريح و تيشرت و شرابات مو لازم تكتمي نفسك خايفة لا يدخلك هواء لأن الهواء ما حيدخلك إلا من الأنف و الفم للرئتين باذن الله .

-  من المشروبات المفضلة لدي و تخفف آلام الدورة بشكل كبير هي زنجبيل مطحون و مغلي + ملعقة عسل. الأعشاب الطبيعية كثرتها مضرة فاكتفي بشي واحد يناسب جسمك و دايما متوفر في بيتك .

-  حمل الأشياء الثقيلة يتعب الظهر و يسبب مشاكل في العظام يصعب حلها مع الوقت فلازم نبتعد عنه في كل الأوقات خاصة وقت الدورة غالبا ما يرتبط بآلام في الظهر لكن تقدري تقومي بمهامك العادية و البسيطة (اتكلم عن الحالات العادية لان في بنات دورتهم متعبة)


- تغيير الفوط كل ثلاث ساعات مرره مهم عشان نتجنب الرطوبة و الروائح الغير مستحبة و كل مره يستحسن نشطف المنطقة بموية دافية أو بغسول اللافندر كتبت عنه قبل و ننشف كويس بمنشفة .

- الشاور مافي أي شي صحيا يمنع من الاستحمام بالعكس في هالفترة بالذات لازم نكون أحرص على النظافة و الموية الدافية اساسا ممكن تساعد في تخفيف شد الظهر و آلام المفاصل . ربع ساعة شاور سريع تنظفي جسمك مستحيل يضرك بأي شكل باذن الله ، لكن عدم الاستحمام ليومين أو أكتر يضر الجسم و يسبب روائح . الرحم مجوف و ما يدخله هواء إلا لو تعرض لتيار هوائي قوي و مباشر و موجه للمنطقة غيره لا ، نشفي نفسك كويس و لا تروحي عند التكييف و جسمك مبلول عشان ما تزكمي .

- خليكي نظيفة و مرتبة في كل وقت و حطي مانيكير كلاسك عشان فرصة يبقى كم يوم ( فرنش ، نيود ، لون أحمر يناسبك ) ، كلي شوكليت عشان النفسية و عيشي حياتك عادي ، الدورة شي طبيعي في حياة الأنثى و تركيبة أجسامنا و هرموناتنا مهيئة لهالفترة لازم بس نهتم بالنضافة . الدورة علامة على خصوبتك و صحة رحمك و انقطاعها عند تقدم العمر يسبب اكتئاب فلا تتنكدي و ترهقي نفسك بكثرة الاعشاب و الوصفات ، الموضوع أبسط من كدا عيشي حياتك عادي و البسي شي مريح و بس و أتمنى كل المعلومات الغير منطقية المتعلقة بصحة الرحم و المهبل تنقرض .

ان شاء الله التدوينة اليوم كانت مفيدة .


♥♥ يسعدني تفاعلكم 

•