خل التوت للشعر من ايف روشيه ❤ Yves Rocher Rasberry Vinegar Rinse

السلام عليكم  ♥

اليوم بتكلم عن  منتج مميز للشعر أضفته لروتين عنايتي و  مررره حبيته : خل التوت للشعر من ايف روشيه.
أول شي المنتج اكتشفته بالصدفة و مرره استغربت اني ماقد سمعت عنه ؛ بحثت و مالقيت إلا تجارب قليلة فقررت إني أغامر و اجربه . حبيييته من أول استخدام و من ثاني تحربة رحت جبت علبة ثانية . المنتج من جد رائع و مميز و شركة ايف روشيه أبدعت في فكرته .

قبل ما أتكلم عالمنتج ، بشرح شوية تقنية شطف الشعر بالخل اللي الكل سمع عن فائدتها في لمعان الشعر و صحته.

الطبقات الخارجية للشعر تغلفه و تحميه و شكلها بالضبط نفس لحاء الأشجار ، قطع متراصة فوق بعض [ توضيح برسم بياني] . حالة الطبقة الخارجية تحدد مدى صحة و لمعان الشعر ؛ لو القطع مقفلة على بعض فالشعر محمي من التلف و التقصف و يكون شكل الشعرة ناعمة و تعكس الضوء فيعطي المظهر الصحي اللامع اللي الكل يطمحله .

لما نغسل الشعر ؛ الطبقات الخارجية تنفتح فتعطي مظهر خشن و ناشف للشعر و بدال ما تعكس الضوء تمتصه فتعطي مظهر باهت و بدون حياة للشعر .

دور الخل انه ينظف الشعر من الترسبات اللي تفتح طبقات الشعر الخارجية و تسكرها  عشان يحقق مظهر صحي و لامع. من فوائد خل التفاح كمان انه يطهر الفروة و ينظفها و يوازن الدهون اللي فيها فيساعد على التخلص من مشاكل الفروة كالحكة و القشرة .

خل التفاح ينشف الشعر لو استخدم بكثرة فالأفضل استخدامه مرتين في الأسبوع.

طبعا أنا من زمان و أنا حابة أجرب شطف الشعر بخل التفاح بس ما اتحمست عشان الريحة الماسكات أو الحنة مهما كانت ريحتها بعدها نغسل الشعر و ننضفه بشامبو و بلسم و تروح الريحة بينما الخل المفروض بكون آخر مرحلة من غسل الشعر فدائما أحس بتلزق الريحة. 

عشان كدا تحمست لمنتج ايف روشيه لأن ريحته توت تجنن [في بنات متزوجات كتير يرسلولي انهم ينحرجوا من ريحة بعض الماسكات و منتجات العناية الطبيعية عند أزواجهم ، أتوقع هالمنتج راح يعجبهم ]  ؛ يجي في علبة صغيرة 150 ملي ؛ العلبة فيها فتحة صغيرة من فوق تساعد على توزيع الخل على الفروة و الشعر .
قوامه مثل الموية بالضبط . و أفضل شي ان مكوناته 98% طبيعية و خالي من البارابان و السيليكون و المكون الرئيسي فيه هو خل التوت الفرنسي و حمض السالاسيلك اللي ينضف الشعر من السيليكون و المواد العالقة اللي تخلي الشعر باهت و ضعيف.

في آخر مرحلة من الشاور أحط شوي على شعري و فروة رأسي و أخليه لمدة دقيقتين و بعدين أشطفه .
أستخدمه في الأسبوع مرة و العلبة تكفي تقريبا ست مرات.

من أول استخدام لاحظت شعري ينشف من الموية بسرعة بدون مجفف شعر ؛ حسيته خفيف و نظييييف و اهم شي  اللمعة الجميلة الصحية في الشعر بعد استعماله.
ماشفت فيه أي سلبية و انصحكم فيه بقوة خاصة انه يناسب جميع أنواع الشعر سعره ب 50 ريال  و متوفر في كل محلات أيف روشيه .

لو حابة تشوفي روتين عنايتي بشعري تلاقيه هنا:    برنامج متكامل للعناية المكثفة بالشعر

♥♥ يسعدني تفاعلكم 

 عبر  الإنستغرام   miramode90

 الايميل  miramode90@gmail.com