❤❤ خريف كوريا الجميل و عطوري المفضلة في البرد







مساء الخير 

تدوينة اليوم خفيفة و بسيطة حبيت أقربكم من أجواءنا الجميلة هالأيام في كوريا .
من يوم كنت طفلة في المدرسة أول ما يدخل شهر أكتوبر و أبدأ أشم ريحة البرد ، تنزل علي سعادة و روقان عجيبين. بالرغم أن الخريف شبه معدوم عندنا كنت دايما أحلم أني أعيش في دولة فيها خريف
و أعيش فيه قصة حب و  أتزوج في الخريف و ربي كتب ان كل هالأشياء الجميلة تحصل لي بالفعل مثل ما تصورت . عشان كدا هالفصل قريب من قلبي و كل شي فيه له طابع خاص الملابس و الأبوات ، السكارفز، المانيكير العودي، ألوان المكياج الغامقة، المشروبات الدافية، الشموع و حتى العطور.






اليوم بيتكلم عن عطوري المفضلة في وقت البرد خلال الفترة اللي راحت.
لو في ريحة أعشقها و مستعدة أكتفي بها فهي
المسك بس عطور الخريف و الشتاء المفضلة بالنسبة لي افضل تكون أدفى و فيها نوتات عنبر أو فانيليا أو خشب الصندل فلا تكون حارة بزيادة و لا سويت و تصدع الرأس.







Chanel Coco Noir

أول عطر  كالعادة في كل شتاء من كل سنة شانيل كوكو نوار، بالرغم أنه ما كان مزاجي و لا ذوقي الاعتيادي في العطور بس في شي غريب خلاني أدمن هالعطر خاصة للسهرات و مستحيل أحطه و ما أنسأل عنه .  العطر أول شي أشم فيه الفواكه الحامضة اللي في التوب نوت ( البرقموت و القريب فروت ) بس ما تطول أبدا كلها دقيقتين و أبدأ أشم النوتات الجميلة اللي جاية على ورود و لما يبرد العطر تبدأ تطلع ريحة عود الصندل و المسك و الباتشولي . العطر أحسه النسخة الأفخم من عطري الحبيب كوكو مادموازال. سعره في حدود ال 800 ريال.





Viva la juicy gold couture


ثاني عطر اشتريته لسبب يضحك و إلا في الحقيقة ماني من معجبين عطور جوسي كوتور.
أول ما دخلت المحل جذبتني علبته و كشكل هو فعلا مميز و توقعت تكون ريحته فروتي سويت بس تفاجأت بريحة دافية فيها فانيلا و كاراميل و لمحة عنبر ، صحيح سويت بس السويت اللي يذكرك بكوب
Toffee Nut Latte دافي  في يوم بارد و جميل.  يومها تركت الشوبينغ و رحت أدور أقرب ستاربكس عشان أطلبه ( حالتي مستعصية ) . في وصف العطر مكتوب انه فيه نوتات رازبيري بس ما أشمها و أتوقع لو الرازبيري موجود بنسبة أعلى بيكون العطر رائع لأنه بيوازن من حلاوته و يخليه أرقى و أروق بس هالشي لا يمنع أن عطر جوسي قولد كوتير من عطوري اللي حبيتها و استخدمها كتير في فصل الخريف .




Yves Saint Laurent Black Opium

ثالث عطر بلاك أوبيوم ، العطر اللي سبب أزمة في الإنترنت لكل المدونين "المختصين" في العطور و حبيت أختم بيه هالمجموعة البسيطة . العطر وقع تقديمه في الأسواق كتطوير لعطر الثمانينات الشهير Opium بشكل مبدع من خلال ادخال عنصر أسود " القهوة " على عطر أنثوي شرقي .. و من أول ما نزل للسوق ما توقفت الريفيوز السلبية و الانتقادات من هالخبراء بينما المبيعات عالية جدا ، المدونون اعتبروه إهانة لإسم عطر أوبيوم و أنه نسخة مملة من العطور المودرن السويت اللي مالها هوية اللي نشرتها لانكوم بعد نجاح عطرها la vie est belle (لانكوم مسؤولة عن إنتاج بعض عطور شركات أخرى منها بلاك أوبيوم ل YSL و عطر Si الشهير لأرماني).

حبيت أكتب هالمعلومة عشان أشرح وجهة نظري في العطور؛ قبل ما أجربه أكيد قرأت رأي النقاد و جاني أحباط لأني كنت متحمسة للعطر و لنوتات القهوة اللي فيه بس لما رحت و شميته ؛ نسيت كل الكلام و النقد اللي قرأته تماما و ركزت مع
احساسي أنا خاصة و أن عطر أوبيوم اللي يعتبر أسطورة في عالم العطور " ما أطيق ريحته علي أبدا " ههه ، العطر شي خاص جدا مو مجرد نوتات ، حتى ريحته ما تطلع نفسها على كل الأشخاص ،في عطور ننفر منها عشان الذكرى اللي ترتبط فيها مو حلوة ، في عطور ما تناسب إلا ناس معينين و ما نتقبلها على شخص آخر و في عطور ما نحبها إلا لأنها تذكرنا بأشخاص و بأماكن و بمشاعر  و هالقيم تختلف من شخص للتاني و مالها مقياس عشان نحدد هل اختياره لهالعطر حلو و الا لا ؟
 ففي النهاية اللي يهم في اختيار العطور هو أولا كيمياء العطر مع جسمك و ثانيا مجموعة الأحاسيس اللي يمثلها هالعطر بالنسبة لك  . أول ما شميت بلاك أوبيوم صحيح حسيت بأنه قريب من العطور الجديدة الفلورال سويت من لانكوم بريحة الكمثرى و الياسمين بس شوية و بدأت نوتات القهوة تطلع و تغطي على النوتات الزهرية بشكل أنيق و فخم و لما يبرد العطر يبقى مكس دافي و جميل من القهوة و الفانيليا و هالشي خلاه مميز.  ثباته و فوحانه عالي و سعره تقريبا 500 ريال.

في عطور شتوية أحب أستخدمها بس ما ذكرتها عشان العلبة مخلصة منها شانيل ألور و لانكوم ميد نايت روز و حاليا أبحث عن عطر شتوي جديد  فلو عندكم إقتراحات يا ريت تكتبولي في التعليقات عطوركم المفضلة في الفصول الباردة  .


و عشان أختم الموضوع حبيت أكتبلكم موقف صغير حصل في سيفورا في مكان ما في العالم ؛
في وحدة كانت تحب عطر و تستخدمه كل خريف و حصل أنها في الخريف اللي ارتبطت فيه، خلص هالعطر و ماعادت اشترته و لا هو عمره شاف علبة العطر عندها و لا عمرها ذكرته له . بعد سنة و نص الاثنين قاعدين "يتسكعوا" في سيفورا, شافت عطرها الخريفي و ابتسمت و حطت منه بس هو أول ما شمه قالها: ريحتك أول ما قابلتك .

العطور مو أسماء ، العطور مشاعر ..



8 comments

  1. عطورك رايقة و تصويرك خطييير ماشاء الله
    يسلم هالذوق و الله , و مبروك عليك الثيم الجديد مره مره مره حبيته ماشاء الله
    ❤❤❤

    ReplyDelete
    Replies
    1. من ذووووقك يا عسل .. ربي يسعدك يا رب . كالعادة طلتك و كلامك يفتح النفس الحبيبتي ♡♡♡

      Delete
  2. اوميقااااااد 😭😭😭😭😂💔 مرا سرحت و اخدتيني لعالم تاني 👏🏼👏🏼👏🏼😭

    انا برضو الخريف افضل الفصول بالنسبة ليا احب الدفىء و الروقان اللي ف + ولدت ف الخريف ✨

    م شاء الله إللهي يسعدك دايماً حبيت انك شاركتي دا الشيء معانا .. مبروككك يكتبلكم السعادة 💜💜💜😽
    حبيت وصفك للنوتات انا احب الروائح الدافئة و اللي فيها شوية سبايس مو مرا مع السويت بس ع حسب تركيبة العطر و كيف يلبق معايا .. من اكتر العطور اللي ارتحتلها و حبيتها دي السنة extatic و أنسأل دايما عنو أفكر اخد منو تاني مني عارفة بس بجد حبيتو 💔👏🏼
    ليا فترة محتارة بين دولتشي dolce حسيتو رايق مرا
    او ارجع ل بالمان اكستاتيك .. مع اني أخدتو صدفة ك تجربة بس م اتوقعت ح أتعلق في لدي الدرجة بجد زمان عن عطر أتعلق ف بزيادة هههه
    للامانة شانيل مرا احسو قوي

    يناسوووو ع الموقف م شاء الله مرا مرا كيوتتت 😭😭✨ كيوياا اونني 💜🙈 و منجد العطور مشاعر زي الموسيقى 🎶

    تصويرك يبكي م شاء الله عليك بجد دي التدوينة سباشل كوماوا حبيتهاا .. و مبروك الستايل الجديد جميل لابقلك 💜

    ReplyDelete
  3. Replies
    1. حبيييت احساسك

      خدتيني فعلا لعالم تاني

      حبيت العطور

      حبييت اعيش قصة حب

      حبييت احساسك تجنني������☕

      Delete

  4. شركة المثالية للتنظيف تسعد بتقديم خدماتها لعملائها بالمنطقة الشرقية خدمات تنظيف خدمات مكافحة حشرات خدمات تسليك مجاري المياه للمطابخ والحمامات جميع الخدمات المنزلية تجدونها مع شركة المثالية للتنظيف بافضل جودة وارخص الاسعار بالاعتماد علي كافة الادوات الحديثة والعمالة الماهرة

    شركة المثالية للتنظيف
    شركة المثالية للتنظيف بالدمام
    شركة المثالية للتنظيف بالخبر

    ReplyDelete

تعليقاتكم الجميلة ❤

Related Posts Plugin for WordPress, Blogger...