☆أفضل و أسوء منتجات من ايلف☆ Elf products Review



السلام عليكم  ♥

اليوم بتكلم عن تجربتي مع منتجات ايلف اللي انشهرت بكونها عملية و رخيصة. الشركة ما عندها محلات و معتمدة عالانترنت لتوزيع منتجاتها عشان تحافظ على انخفاض التكلفة.
لما طلبت المنتجات ما كان عندي فكرة كيف بتكون تجربتي معها لأنه صعب تطلبي ميك أب من الموقع بدون ما تكوني جربتيه او على الأقل عندك فكرة على جودته فان شاء الله هالتدوينة تكون مفيدة للبنات اللي يفكروا يطلبوا منتجات ايلف و محتارين.

1. أفضل منتجات جربتها من ايلف 








  ELF cream eyeliner

من أكثر المنتجات اللي حبيتها من ايلف و أتوقع واضح من الصورة إني استعملته كتيير و أكيد برجع أشتريه.
سواده و ثباته جدا حلو مقارنة بمنتجات أغلى . أهم شي عندي في الجل لينر انه ما يخطط تعرفوا لما تحطي لاينر و يتقشر و يخطط و ينمسح بسرعة؟ هالشي أبدا ما لاحظته مع هالمنتج .
كمان يبقى كريمي و رطب حتى بعد مدة طويلة من الاستعمال ؛ اللي في الصورة له تقريبا سنة و لسا زي ماهو لا تكتل و لا نشف عكس نفس المنتج من ميبيلين كلها كم شهر و سار استخدامه مرة صعب.

كنت مدمنة على جل لاينر من بوبي براون و ما توقعت انه ايلف بيعوضه بس حسيت أنه حرام ادفع عشر أضعاف السعر على نفس النتيجة.
الفرشة اللي تجي معاه مو واااو بس تفك أزمة فدايما أخليها في شنطة مكياج الدوام للاستعمال السريع.
في ناس قارنوه ب Mac FluidLine بس أنا ما جربت إلا ميبيلين و بوبي براون .
سعره 3$ أو 12 ريال
سعر جل لاينر ميبيلين في حدود 10$ أو 37 ريال
سعر جل لاينر ماك 75 ريال
سعر جل لاينر بوبي براون في حدود ال 90 ريال .






♥ Elf Contouring Blush and bronzer st Lucia

باليت الكونتور من ايلف شي جمييييل من جد و أبدا أبدا ما توقعته يكون ممتاز.
أولا البلاشر لونه بنكي مشمشي جميل و مناسب جدا للطلعات النهارية ؛ اللمعة أول ما تنحط عالوجه ما تبان بالعكس تخلي الخدود فيها تورد طبيعي ما كأنك حاطة بلاشر.
البرونزر درجته مثالية للبشرة الفاتحة و المتوسطة ؛ لمسة خفيفة منه تكفي و يطلع لون البشرة جميل خاصة في الصيف . في بعض البرونزرات ( جمع برونزر ) يخلي وجهك برتقالي أو مغبر و هالشي يكرهني في اللوك البرونزي بس هالمنتج لو طبق بطريقة صحيحة و بدون مبالغة يطلع بطل .
التعليب عملي جدا و قوي كم مرة تطيح عليا و ما تتكسر و فيه له مراية كبيرة كثير ناس قارنو بينه و بين المنتج الشهير  Nars Orgasm Laguna ؛ من تجربتي  المنتجين قريبين لبعض جدااااا في الشكل الخارجي و لون المنتج في العلبة لكن عالوجه يبان الفرق ؛
بلاشر نارس لونه مايل للمشمشي أكتر و البودرة مرررره ناعمة و لمعته الذهبية مع الأضائة تنور الوجه. و برونزر ايلف أغمق من برونزر نارس بشوية. الفرق في السعر بين المنتجين مهول و صراحة على سعره باليت أيلف يعتبر ممتاز و مناسب جدا للوك صيفي فيه glow و أكيد أنصح الكل انهم يجربوه.
سعر باليت أيلف: 3 دولار ( يب !!) أو 12 ريال
سعر باليت نارس 42 دولار أو 160 ريال من سيفورا.





♥  Elf studio blushes

بلاشرات أيلف تجربتي معاهم مو أيجابية تماما لكن مو سلبية. 
أولا الألوان مغرية جدا و شكلها مرة حلو من النت و حتى في العلبة نفسها و أنا من جمالها احترت أي ألوان أطلب و في النهاية استقريت على هالألوان  4 
بلاشر وواحد هايلايت

-الهايلايت اسمه  gotta glow سيء الى ابعد الحدود ؛ ما عجبني لونه , مايل للأصفر و كمان قطع القليتر اللي فيه كبيرة وواضحة ؛ يمكن طريقتي في تطبيقه ما كانت مناسبة بس جربته اكتر من مرة و ما ناسبني ؛ أنا احب الهايلايت يكون لؤلؤي أو ذهبي خفيف و ما يخلي أثر بس لمعة خفيفة أو توهج صحي للبشرة.

- بلاشر بلاشينغ روز blushing rose لونه بنك دافي جميييل و يبان من أول مرة بس مو ثابت :  ثلاث ساعات بالكثير ما يبقى الا اثر خفيف

- بلاشر ميلو موف mellow mauve أخذته عشان أكسر روتيني المعتاد في اختيار البلاشرز و حبيت شي يكون لونه جريء و قوي للوكات الخريف و الشتاء و مررره مبسوطة اني اخترته ؛ من اسمه واضح انه أقرب درجة من البينك للموف ( جملة غريبة) . جت فترة علقت عليه بس احطه مع روج عنابي و اي لاينر عريض . ثباته متوسط و فيه قليتر خفيف.

- بلاشر كانديد كورال candid coral لونه مشمشي دافي قريب للأورانج سمعت عنه مدح كتير في النت و لونه جميل جدا بس لازم نعيدي و تزيدي عليه عشان يادوب تطلع ريحة اللون ؛ عشان اصورلكم السواتش حفرت العلبة حفر و طبعا شوية اللون اللي يطلع شوي و يروح تماما و لا كأنك حطيتي شي.

- بلاشر بيتشي كين peachy keen كنت متحمستله عشان أعشق درجات المشمشي في البلاشر ؛ لونه مرره حلو و مناسب لمكياج الصباح بس ثباته سيء جدا و نفس الملاحظة مع اللون اللي قبله ما يطلع من أول مرة.


 رأيي النهائي : أنا بالعادة ما أحب أجمع بلاشرات كتير.  أفضل يكون عندي لونين أو ثلاثة مناسبين لبشرتي و كواليتي عالية  بس حب التجربة و السعر المغري خلاني اتحمس و أطلبهم. لو بعيد التجربة ما بطلب إلا بلاشنغ روز و ميلو موف لانهم رهيبين مقارنة بالسعر.
سعرهم الواحد ب3 دولار أو 12 ريال




♥ Elf Lip exfoliator

مقشر الشفايف من أيلف ، كتبت عنه قبل كدا بس حبيت أذكره من ضمن أفضل منتجات أيلف اللي جربتها
مكوناته: سكر، زبدة الشيا و بذور العنب
و يجي على شكل روج الشي اللي يخليه عملي و سهل الاستخدام
ريحته لذيذة تذكرني بالكوكيز
تقشيره جميل و ما يجرح الشفايف ، أستعمله مرتين في الأسبوع و ارطب شفايفي و اقوم ألقاها نااااعمة و متوردة و اي لون روج احطه يطلع يجنن ( بنات مافي اسوء من منظر الروج متشقق من جفاف الشفايف )
نتيجته اشوفها حلوة و نفس التقشير بالزيت+السكر لكن لما يكون المقشر جاهز و متوفر عندك طول الوقت حيسهل عليكي العناية و المحافظة على جمال شفايفك لما 
ما يكون عندك وقت تجهزي المقشر بنفسك
سعره  3 دولار يعني 12 ريال



2. أسوء منتجات جربتها من ايلف:





آخر جزء من تجربتي لمنتجات ايلف منتجات ماعجبتني 

1. محدد شفايف جامبو 
 فكرته زي فكرة المحددات الجامبو من NYX لونه جميل ؛ نيود لحمي على بينك و معاه هايلايت جميل لمنطقة فوق الشفايف عشان يبرزها بس حسيت انه نشف شفايفي مررره ؛ مدري احساسه مو حلو و لا مريح ماشاء الله حتا الأرواج المطفية ما تجفف شفايفي عشان مهتمة بالترطيب بس هالمنتج ما ناسبني ابدا و بطلت استعماله بالرغم انه اللون حلو.

2.  Oil free concealer
مخفي عيوب خالي من الزيت ؛ ما عجبني تغطيته خفيفة  مررررره و  قوامه كأنه فاونديشن هادا غير ريحته القوية المزعجة . جربته اكتر من مرة في مناسبات عشان ما استخدم كنسيلر بشكل يومي صحيح ما سد المسام و لا سببلي حبوب الحمد لله بس ما عجبني و لا أفكر آخذه مرة تانية

3.  Elf Liquid Liner 
 كحل سائل ؛ أخذته بعد ما جربت الايلاينر الكﻻيمي البطل تبعهم بس طلع فاشل ؛ ساائل بزيادة و خفيف ؛ الريشة ما تساعد ترسمي خط اللاينر و سواد 
اللاينر نفسه مو حلو ؛ باهت و يروح بسرعة اقل لمسة لجفونك تحوس الدنيا


 Elf high definition powder .4
البودرة في الشكل تشبه كتير لبودرة ميكيب فوريفر بس بس ما ناسبتني ابدا لسببين : اولا بشرتي فاتحة و هالبودرة فتحتها بزيادة خلت وجهي يطلع شفاف كأني مريضة . حاولت احط بس شوية بس دايما نفس النتيجة و اللمعة اللي فيها عجزت أتقبلها . قريت تجارب أجنبيات بشراتهم فاتحة جدا و اشتكو من نفس النقطة انها تبيض الوجه بشكل مو طبيعي .  الشي الايجابي اللي لاحظته فيها انها ناااااعمة و تخلي بشرة الوجه حرير من النعومة .ما عمري جربت بودرة انعم من هالبودرة بس اللون و اللمعة مره ما يحمس اني استخدمها مرة تانية أبدا





  كل منتجات أيلف انا اطلبها من موقع اي هيرب و شرحت طريقة الطلب هنا : طريقة الطلب من موقع iherb




 يسعدني تفاعلكم 



 عبر  الإنستغرام   miramode90

 الايميل  miramode90@gmail.com




3 comments


  1. شركة تنظيف منازل بالدمام :
    الكثير من الأخطاء يمكن أن ترتكب في حق منزلك إذا أنت قررت تنظيفه بنفسك باستخدام وسائلك التقليدية ، فإن عوامل اتساع مساحة المنازل و العائلات كبيرة العدد وظروف البيئة التي تزيد من معدل اتساخ المنازل ، تقضي بفشل محاولتك للتعامل مع هذا الأمر بمعرفتك ، ويعلي من شأن الاستعانة بشركة تنظيف محترفة ، خاصة إذا كانت شركة تنظيف بالدمام بإمكانها أن تمنحك فوق ما تطمح إليه في تنظيف منزلك حيث يجري العمل على النحو التالي :

    شركة تنظيف منازل بالدمام

    #نزل_سنابك #يوم_الجمعه #بيتنا_بدون_بدايه

    https://alfaris-aleurbaa.com

    ReplyDelete
    Replies
    1. جزاك الله خير استفدت مره💜💜

      Delete

تعليقاتكم الجميلة ❤

Related Posts Plugin for WordPress, Blogger...