Everything you need to know about Shea Butter ☆ كيف أختار زبدة الشيا

السلام عليكم  ♥ 

اليوم بحاول أشرحلكم أنواع زبدة الشيا المتوفرة في السوق عشان ما تحتاري وقت الشراء.
  طبعا ما يخفى على أحد فوائد زبدة الشيا للجسم و الشعر اللي الكل يتكلم عنها في السنوات الأخيرة و حتا أكبر الشركات العالمية ركبت الموجة و أصدرت منتجات تحتوي على زبدة الشيا
( بطلع عن  الموضوع شوي  :  ما تلاحظو كل فترة يطلعوا بمنتج أساسا موجود من آلاف السنوات و يسير حديث كل المجلات و البلوقرز و الشركات و التجار و يعتبروه المنتج السحري في عالم التجميل و بعد فترة يبرد حماسهم استعدادا لإطلاق منتج سحري ثاني ؟ هههه زيت الأركان المغربي ، زبدة الكاكاو،  زبدة الشيا ، الفيتامين سي الخ .. كل هالمنتجات رائعة و فوائدها مثبته علمية و أنا شخصيا أستخدمها كلها بس عندي فضول أعرف مين اللي يتحكم في التوجه العام لشركات التجميل  و كيف يقدروا يخلونا نتبعهم بالسهولة،؟.... ، هههه  خلصت فلسفة يلا نرجع لموضوعنا) .

مثل ما قلت بسبب انه الكل يتكلم عن زبدة الشيا فجميع اللي يشتغلو في مجال التجميل يحاولو يوفروه استجابة لطلبات زبائنهم.  طبعا هالكلام جميل لأنه لو ما كان في تجار و تبادلات تجارية بين الدول من فين حنجيب كل هالمنتجات الرائعة و اللي أغلبها متوفر فقط في القارة الغنية الفقيرة: أفريقيا.  طيب  فين المشكل؟ المشكل في الغش التجاري و مغالطة المستهلك !! كل تاجر يدعي أنه الزبدة اللي يوفرها أصلية و الباقي كلهم تقليد و مالها فوائد و أنه يجيبها من المصدر الأساسي... و تنوعت المنتجات و اختلفت الأسعار و البنات مو عارفين يصدقوا مين و الا مين.  و طبعا عندنا مافي اي جهة تحمي المستهلك في حال انخدعوا و دفعوا مبلغ و قدره في منتجات رديئة .
الحل ؟ اننا نبحث و نتثقف حول المنتج اللي بنستعمله عشان محد يوجهنا توجه خاطئ  و نحاول نفهم أكثر طبيعة المنتج لأن الكثير سمع عن فوائده بس ما يعرف عنه المعلومات الكافية.

أول مرة استخدمت فيها زبدة الشيا كانت في 2010 ، كنت أول مرة يمر علي شتاء بارد و ثلوج و جسمي تعب من الجفاف الشديد و كل المرطبات العادية ما سوتلي شي ، زميلتي أمها عندها شركة  منتجات تجميل طبيعية و عضوية صغيرة جابتلي قطعة زبدة شيا خام و شرحتلي طريقتها : حطيتها في المايكرويف شوية و دهنت بيها جسمي كله و نمت. و الله كأنها سحر ، الجفاف راح، جسمي رجع مترطب و ندي لايااااام  . لما قابلت أمها عشان أشكرها حكتلي كتير عن زبدة الشيا و استعمالاتها و كيف تجيب أفضل الأنواع و أكثرها جودة . المهم من وقتها و كل فترة ترسلي كمية أستخدمها في كريماتي . قريت عنها كثيير و شفت أفلام وثائقية عن تجارة الشيا و اليوم حبيت أشارككم هالمعلومات.

ايش هي زبدة الشيا ؟

شجرة الشيا أو الكاريتي تنبت فقط في غرب أفريقيا و تنتج نوع من البذور أو المكسرات تصنع منه نساء أفريقيا زبدة تستعمل عندهم من آلاف السنوات في ترطيب الجسم، صناعة الشمع، تشميع الخشب !!! و حتا الطبخ . ( أول ما قريت عالمعلومة صراحة الشي الوحيد اللي جا في بالي انه سبحان الله رحمته وسعت كل شي ، عدد كبير جدا من النساء في غرب أفريقيا مصدر رزق عائلاتهم الوحيد هو  تجارة زبدة الشيا ، زبدة متوفرة عندهم بكميات هائلة و رخيصة جدا  لكن الله سخرلهم فيها فوائد خلت شركات التجميل و النساء في جميع أنحاء العالم تتهافت و تدفع مبالغ طائلة عشان تقتني منها كمية صغيرة تستعملها لأغراض تجميلية. أنا أشوفه رزق ساقه الله لهم ♡) 

كيف تصنع زبدة الشيا ؟

شفت فلم وثاقي عن صنع الشيا و ما تتخيلو قد ايش تتطلب شغل و كل مرحلة بداية من جمع الشيا كبذور تتم يدويا ، أول شي تجفف البذور (nuts )  و تنشال قشرتها الخارجية . بعدها يتم طحنها و تحميصها ( عشان كدا ريحة زبدة الشيا الخام كأنها ريحة شي محمص او محروق ) و بعدها يتم تغليتها في الماء :الزبدة تتكون و ترتفع على سطح الماء و يقع تجميعها و خزنها) . الى هنا المفروض تنتهي عملية صنع الشيا و تتكون زبدة خام غنية بالفوائد الرائعة للجسم لونها يختلف بإختلاف أنواع البذور لكن يترواح بين اللون البيج الى الأصفر (مافي زبدة شيا خام بيضاء).

 مو دايما الزبدة اللي نشتريها تكون خام ، في أغلب الأحيان تتعرض للتكرير و تفقد الكثير من خصائصها و بعددلكم الأنواع اللي متوفرة في السوق.


1. زبدة الشيا الخام Raw Shea Butter

هي زبدة الشيا في أنقى حالاتها ، لا تقع تصفيتها و لا فلترتها بأي شكل من الأشكال . تجي على شكل معجون ولانه لم تقع تصفيتها فممكن نلاقي فيها بعض بقايا بذور الشيا . رائحتها قوية جدا ( و كريهة) و لونها أصفر داكن .

في تجار الشيا ( أتكلم عن بعض المزودين الكبار) يحاولو يخدعوا الناس لأقناعهم ان زبدتهم خام عبر اضافة بعض المكونات لتغير لونها أو رائحتها و للأسف لو الزبدة معلبة في وعاء بلاستيكي و فيها ستيكر مكتوب عليه زبدة شيا خام صعب جدا التثبت من صحة هالكلام لأنه مافي شركة مسؤولة عن التعليب و لا تعرفي طريقة حفظها و تخزينها فانتي بهذا الشكل تشتري في شي مجهول ممكن يطلع زبدة شيا خام و تفيدك لكن ممكن كمان تطلع زبدة مضروبة و للأسف هادا السبب يخليني أبعد عن الزبدة اللي ما توزعها شركة مسجلة و بوريكم بعض الصور من النت لناس اشتروها من الأمازون على أساس انها زبدة خام  و جتهم على هالشكل : 

صراحة و رأيي الشخصي اللي يمثلني أنا فقط ، مستحيل أحط هالشي على جسمي لو ايش . ما عندي أي معلومة تضمن انها زبدة شيا خام  هذا أضافة للتعليب السيء اللي يعرضها للشمس و الغبار و الأوساخ و طبعا كلنا نعرف انه زبدات الجسم الطبيعية لازم تحفط في مكان بعيد عن أشعة الشمس للحفاظ على خصائصها . 

2. زبدة الشيا الغير مكررة Unrefined Shea Butter

تفرق عن الشيا الخام بشيء بسيط جدا ، إنها تفلتر لتنقيتها من بقايا البذور و تحسين ملمسها مع الأحتفاظ بجميع مكوناتها الخام و فوائدها . ممكن تضاف لها بعض المكونات الطبيعية أما لتخفيف رائحتها النفاذة أو زيادة فوائدها . تأتي في شكل معجون أو قوالب.
أنا شخصيا أفضل هالنوع لو ما توفرتلي الخام من مصدر موثوق . أكون ضامنه أنه الزبدة لسا فيها كل الفوائد و في نفس الوقت تعليبها و طريقة تغليفها و شحنها صحي و ممكن أثق فيه . مو لازم شركة بذاتها بس لازم تبحثى عن كلمة unrefined و أنا أستعمل هالزبدة و تكلمت عنها في روتين عنايتي بيدي
 ( هنا )

3.زبدة الشيا المكررة Refined Shea Butter



هي زبدة شيا مكررة  باستخدام درجات حرارة عالية اضافة الى بعض المواد الكيميائية لتغيير أو إزالة رائحتها أو تغيير قوامها .
خلال عملية التكرير تفقد الزبدة الكثير من خصائصها و فوائدها الطبيعية ، ممكن تستعملو زبدة شيا مكررة و تكون مرطبة لكن لا تتوقعوا منها فوائد أكتر من الترطيب اللي ممكن  اي زبدة طبيعية تانية  تحققها. 

ممكن نتساؤل ليش شركة ممكن تأخذ شي كله فوائد للجسم مثل زبدة الشيا الخام و تكررها ؟
الجواب مرة سهل: الزبدة الخام و الغير مكررة صعب جدا استخدامها في الكريمات التجميلية عشان قوامها ثقيل و رائحتها غير مقبولة .

النساء في الدول العربية خاصة ما عندنا مشكلة نستخدم مواد و خلطات رائحتها قوية ( خلطات الحلبة و الأعشاب و الحنة و زيت جنين القمح الخ الخ) لكن الشريحة الكبرى من المستهليكين لمواد التجميل في العالم من الأجانب  ما يحبوا الروائح القوية و لا يتحملوها ( حتا في اختياراتهم للعطور يفضلو الروائح الخفيفة جدا بينما  كثيير مننا يفضل العطور القوية الشرقية الثابتة ) فهادي الشركات يظطروا يكرروا زبدة الشيا لأزالة الرائحة تماما او تخفيفها. كمان زبدة الشيا المكررة أسهل في التعليب و ما تكلفهم كثير لانها أقل صلابة من الزبدة الخام فتوفر عليهم تكاليف الإنتاج.
  لون زبدة الشيا المكررة يكون أبيض و مافيها رائحة .

أكثر زبدة شيا مكررة مبيعا هي زبدة الشيا من ناو Now .
 الشركة نفسها لا تدعي انه زبدتها خام أو غير مكررة ، هي فقط تسوق لها كزبدة شيا صافية ( يعني مو مخلوطة بشي تاني ) و هادالا يعني ابدا أنها غير مكررة ؛ هي فقط استراتيجية تسويقية لأنهم لو كتبوا انها غير مكررة أو خام بيكونوا مخالفين للقانون و ممكن تنرفع ضدهم قضايا.

شركة Now مشهورة و موثوقة جدا و انا استعمل كل زيوتهم و هما ما كذبوا علينا و لا خدعونا ، فقط قلة معرفتنا بالمنتجات اللي نقتنيها تفسح المجال للبعض لاستغلالنا. و على فكرة عديد كبير من الأجانب اللي اشتروها يشتكوا من انها مو خام .
الشركة أطلقت نوع ثاني أغلى بشوي و كتبوا انها غضوية يعني كمان مكررة لكن بدون استخدام مواد كيميائية ( اتوقع فقط تكرير بالحرارة) . هالشي يخليني افضل شراء زبدة الشيا من شركات بدل ما تكون مجهولة المصدر لان القوانين اللي تخضغ لها الشركات صارمة جدا و يفرض عليهم المصداقية. 

فلو حابة ترطيب فقط بدون فوائد زبدة الشيا و عندك مشكلة مع الروائح القوية مثل هالمنتجات بيناسبك . 

4.زبدة الشيا المكررة اكثر من مرة Ultra refined Shea Butter

هي زبدة شيا مكررة لأكثر من مرتين لدرجة فقدانه لاغلب خصائصها الطبيعية . عموما تباع للشركات التجميلية الكبيرة لاضافتها لمنتجاتهم من مرطبات و لوشنات . 

100% Pure Shea Butter 

هالجملة مستعملة كثير في بعض انواع زبدة الشيا لكن لا تعني أبدا انه المنتج خام أو غير مكرر . ممكن يكون مكرر و تم 
اضافة بعض المواد الكيميائية له و لكن لسا يعتبر 100% زبدة شيا لأنه ما حدد      هل هي خام مكررة أو غير مكررة.

للخلاصة ، في أنواع كثيرة من زبدة الشيا في السوق ، كلمة زبدة أصلية أو غير أصلية ما تعني اي شي و يقع استخدامها فقط لقلة المعلومات اللي عند المستهلك العربي عن الفرق بين فوائد الزبدة حسب المراحل الي تمر فيها بعد تكونها كزبدة خام و في الأغلب يكون مصطلح "زبدة أصلية " مبرر لرفع سعرها .

الموضوع هدفه مو دفعكم لشراء شي معين أو مقاطعة بعض المنتجات من الشركات او التاجرات ، هدفي فقط التوعية عشان تكوني عارفة الفرق بين الأنواع المتوفرة و انتي اختاري اللي يناسبك.

و آخر شي بضيف بإيجاز بعض فوائد زبدة الشيا و طريقة استخدامها .
زبدة الشيا الخام تحتوي على الفيتامين A و E و F أضافة الي الدهون الطبيعية اللي ترطب بعمق و كمان فيها نسبة حماية بسيطة من الشمس (SPF 6 ) . تفيد في علاج البشرة من  الخطوط البيضاء ،التشققات و الاكزيما . يفضل استعمالها للجسم فقط لان قوامها ثقيل على بشرة الوجة.
تستعمل كذلك لترطيب الشعر و علاج التقصف .
زبدة الشيا قوامها صلب و صعب استعمالها مباشرة فالاحسن تسخين كمية صغيرة في المايكرويف او حمام مائي.

ان شاء الله التدوينة كانت واضحة و مفيدة  . 

♥♥ يسعدني تفاعلكم 

 عبر  الإنستغرام   miramode90

 الايميل  miramode90@gmail.com